Британияда ўзини ўзи изоляция қилган фуқароларга пул тўлаш таклиф қилинмоқда

Британия ҳукумати амалдорлари коронавирусга мусбат тест топширган фуқароларнинг уйда ўтиришлари учун пул тўланишини таклиф қилишмоқда.

Тайёрланган режага кўра, бундай фуқароларга 500 фунт стерлингдан (685 доллар) пул тўлаш кўзда тутилмоқда. Ҳозирча мазкур молиявий ёрдамни карантин вақтида уйда ўтиришга мажбур энг кам даромадга эга бўлганларга тўлаш кўзда тутилган.

Ушбу ташаббус ойига тахминан 2 млрд фунт стерлингга тушади, деб ёзади ҳужжат лойиҳаси билан танишган The Guardian нашри.

Буюк Британияда учинчи марта локдаун эълон қилинган, мамлакат коронавирусдан ўлимлар сони бўйича Европада етакчилик қилмоқда.

Мамлакат бош вазири Борис Жонсон локдаун ёз фаслигача давом этиши мумкинлигини айтган.